الدبيبة منارة الحضارة
زائرنا الكريم نرحب بك ونتمنا انضمامك الينا

نظم في رثاء الشاعر الانسان (حميد) ..

استعرض الموضوع السابق استعرض الموضوع التالي اذهب الى الأسفل

نظم في رثاء الشاعر الانسان (حميد) ..

مُساهمة من طرف مدثر محمد خير في الإثنين أبريل 16, 2012 6:23 am

زولاَ من التربالة كان ..

يا الله من دمع الرجال .

يا الله مِنْ هذا الحَزَنْ

الدَفَقْ .. زيْ نِيْلْنَا سَالْ ..

يا الله مِن هَذَا اللّهِيبْ ...

إِتْوَسَّدْ النَّفِسْ النَحِيب ..

الدُّنيا غَمّتْ و البِلَاد ..

و بِمَا تَشِيلُو مِن العِبَاد ..

دَفَنَتْ علي مَرْأي البَصَر

فِي تُرْبَهَا الرَّطِبْ الخَصيب

زولاً مِن التَرْبَالة كَان

شَاعِرنَا حِمّيد النّجِيب ..

***

يا الله مِنْ هَذَا الوَجَعْ ..

شَاعِرنَا حِمّيد النّجَعْ ..

سَافَر الي المَلَكوت رَجَعْ ..

يَهْدِيهُو مِن حَرْفُو السّجَعْ ..

وُ خلّانَا فِي وَجَع الرّحِيل

كُل الحروف صَابَا الهَلَعْ ..

***

كُلْ الوَطَن ..

مِن بَعْد مَا رَحَل الوطَن

أصْبَح عَضِير ..

..

كل العَصَافِير التَغَنّي ..

..

كل المَوَاعِيد .. التَمَنِّي ..

كل الأَيادي اللوّحتْ .. وُ كانَت تَثَنِّي
..
كُل الأكُفْ الصَفَّقَت

ليْ نَظْم حرْفك بي تَمَنّي ...

كُل الأنَامِل .. و المَفَاصِل ..

و المَعَاوِل .. هَيْ كأنّي ..

كأني بيها وَكِت رحِيلك دون تأنّي ..!!

صَابَها مَا صَابَك .. تَجَنِّي ..!!

إستغفر الله الرحيم ..

يا رفِيق موتَك فَتَنّي ...!!

***

الموتْ سَبيل الأوّلين ..

الموت سَبِيل الآخرين ..

الموت هُو حَقْ ..

بَسْ لَا موت مَع الحَرْفْ الرَزِين ..!!!

الصَاحِي دايمَاً مَا بْيَمُوتْ ..

لا يَغْبَى لا يَسْهَى و يَفُوت ..

" لا يخُون بَصِيرتُو الإنْتِبَاه "

وُ نٍحْنَ الحَزَانَى بِموتْ جَسَدْ

" خَتّينا آه "

آهْتين عَلَي الزّول السَّمِح ..

دَاخْرِنّو ليْ سَاَعة رَجَاه ..

سَاعَة يَمَرْقُوا الكَادِحِين ..

فِي الشّارِع الدّخْرِي الأمِين ..

رَافْعِين هُتَاف صوتُهم سَنِين ..

أن لا يَفْقِد السُّودَان نَدَاه ..

تِحْتَ البَنَادِقْ و المَشَانِق و العَفَنْ ..

تحْت العَسَاكِر و المَسَاخِر وَ الحَزَنْ ..

تَحْكُمْنَا بيْ صَفَا و انْتِبَاه ..!!

دَاخْرِنّو للوَطَن الكَبِير ..

للشّعْب و القول المُبين ..

لا يَرْجَع الخَاطِر كَسِير ..

و لا يَرْجَع السّيف الجّفِير ..

غير نَلْقَا تَار بلداً حزِين ..

غَنّاهُو يوْت بيْ حَرْفُو زين ..

ختّاهُ فِي حِصنَاً حصِين ..

و رَمّاهُ بالشّعْر الرّصِين ..

***
حمّيدنَا فَاتْ ..

لكنّو حيْ .. صَاحِي و يِمِشْ ..

بينَاتنَا فِي الرّوح عَادْ يَخُش ..

كَلِماتُو في ضوء النهار ..

شايلاها للدُّنيا الشّمِشْ ..

سَارْجَابا أعْمِدَة البَلَدْ ..

شَان تحْيا جُوّانَا و تَعِشْ ..

***
حمّيدنَا يا أصْل النّخِيل ..

جاكَ النّخِيل قاصِد رِضَاك ..

حميدنا يا معني " الحِسين" ..

" ياكا الزّين ود حامد داك" ..

"كان متوفِّي .. ياكا الزّين"

وُ كُتْ مُتكفِّي بِمَعنَي الزّين ..

صَابِر و شَاكِر مَا هَمّاك ..

كُلْ النّاس اتْنين اتنين ..

و إنْتَ كَنَخْلَة وِقِفْتَ بَرَاك ..

كَمْ لَاويت الرّيح الهُوج ..

و كَمْ صَارَعْت بِكِلمَة الموج ..

و نِحنَ يَردِد صوتْنَا وَرَاك ..

حمّيد يا زول ..

و جَمِيل بِالحيْل ..

يا مَعْنَي أنِيقْ ..

يا كَامِن فِي جوْف زَهْرَة رَحِيقْ ..

يا مَالِي ظلام الدّنيَا بَرِيقْ ..

الليلة إتْرَشَ فِي جوْفَنَا حَرِيقْ ..

لو تَفْتَح بينَك وُ بينّا طريقْ ..

الشَّعْبَ الكَادِح رِيقُو دَقَيقْ ..

يا الحَرْفَك كَان فَرّاق الضِيقْ ..

حمّيد يا زول ..

فَاتْ بيْ إحْسَان ..

مُبْتَل الرّيق ..

مِن نيل البَلد الأدّا الذوق ..

مِن حُب النّاس .. زَمِيل وُ صَدَيْق ..

***
حمّيد يا نِيل ..

علي أرضْ الوَطَن البِكْرَة ...

حمّيد يا جِيل ..

ضَارِب فِي تاريخ الفِكْرة ..

حمّيد يا سيل ..

يجْرُف نَبْت السُوسَة النَكِرَة ..

يدِّينَا بَدِيل

الأمَل الطيّب وُ حُسْن البِذرة ..

علي أرضْ النّيل

تَنْبُت زَهْرة تَعيش يوم بُكْرة ..

***
فِي مَلَكوْتَك كُون مُرْتاح

بالدّعَوَات الطّيبة تجِيك ..

فِي عُصفُور الجنّة بَرَاح

رُوحُو بِتَفْرَح بيكَ شرِيك ..

و نِحْنَ نَمِد الأيدِي نُصَاح ..

عَهْدَاً واحِد نَقْطَعُوا ليك ..

نَفْضَل نَعْرِف بيكَ الصَّاح

و حَرْفَك دِيمَة يَلِمَنَا بيك ..

***
بُكرة الدّنيا حَ تَبْقَي سَمَاح ..

"حمتو" بِتَبرا فِي جوفُو جِرَاح ..

"عيوشة" بِتَملا الكوْن أفرَاح ..

الشّعب يقول "أرضاً يا سلاح"
..
"سفِينَة تَشِيل عَرَق الكُدّاح"

تَرجَع أقلَام و كُتُب و ألوَاح ..

أطفَالنَا بِتَكْبَر نُور وُ صَلَاح ..

البلدْ الوَاحِد يَبْقي نَجَاح ..

وُ نَهْج الثّورَة الفِينَا .. مُبَاح ..

***
يا زولاَ كَان سُودَانِي أصِيل ..

يا خَاتِي الميْل ..

نَبْكِيك بالدّمعِ و سَمْحَ القول ..

يا ريت لو يَقدَر ليك يطُول ..

بينات جنّات الخُلْدِ تَجُول ..

دَعَوات بالرّحْمَة و حُسْن مَآل ..

بين الشُهَدَاء كُنْ طَيّب حَال ..

...........
__________________
avatar
مدثر محمد خير
زول بلد

عدد المساهمات : 50
نقاط : 70
تاريخ التسجيل : 19/12/2010
العمر : 37
الموقع : الخرطوم

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: نظم في رثاء الشاعر الانسان (حميد) ..

مُساهمة من طرف الشيخابي في الأحد مايو 06, 2012 6:18 am

"يـا وطن عــز الشدائد"
وينو راح (حِميدنا) فايــت
وليه هُـو كان عجلان فراقنا
وليه هــو دِيـمــة حُــزنـا بايت
ومابتَكـْمـل لينـا فــرحـة
ما بِقِــيتنا بلاهو (قَــايِتْ)
ياهـو كان نيلنا وتمُــرنا
وياهــا (عَيُّوشـــة) وجَمُـرنا
يَبقــى بَعْدَك أيه عُــذرنا
وياهــا (نُورا)
بي حُبورا
" وشُـفَّع العــرب الفتـارى "
وكلمة الحــق والجســارة
ويا وطن عــزّ الفـراق
كيف يشيلك بــعدو ســاق
ومين بِنــوِّر (نَــورِي) بعـدك
ويــدِي للرُطــب المـذاق
ياكـا تَربـالـنا المُـزارع
وباقِــي أفعــالنـا المُضــارع
فُتَّـا ليـه خَــليتنا بَعْــدك
نَحنـا في حُــزنك نَصــارع
كِترت أحمالنا وهُمومنا
ومِحْــنة الوَجـع المُخِيــف
لســه راجياك باقِية نُــورا
كاسرَة في الجــرح النَزِيـف
لا دمُوع عَينِيها جَـفّتْ
لا أظِـنَّهـا يوم تَقِيــف
يُوم سَكَتْ وَتــر المُغَنِّـي
في قِـلـيـب زيَّـك رَهِــيف
بَكّـت الأحــزان فَــرحـنـا
وبَكَّـت الوطـن الضـعيف
أبكي (سِت الدار) ونُــوحِــي
بـي جُــروحك وبــي وجُــروحي
يُــوم مَـشــيتْ سَلِّـيتو رَوُحــِي
إنتَ كُــت طَيِّـب حِنيِّن
كَـيف قِــدرت اليوم قِســيتْ
كُنْـتَ بِتقُول جــاي غيمـــة
تملأ ماعُــونــا وتَقِــيت
" وشُـفَّع العــرب الفَـتارى "
شِــن بِفِنُّــو الليلة بَـعــدك
لا مَشـيتلم لا كـا جِــيتْ

(منقول)
avatar
الشيخابي
زول بلد

عدد المساهمات : 62
نقاط : 76
تاريخ التسجيل : 19/12/2010
الموقع : لم يتم تشييده

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى